I mè augüri par un Natäl e un ann növ culmi da salüd, speränza e sudisfaziûn… dal mè libar “I balóss” – Ul Lisändar

…L’avéva cataa ’na caséta piena da butìli vöi, l’avéva purtaa al piän da sura e po’, cun fórza, l’avéva bütaa giô dai basèi. Gh’eva stai un fracass da mìa dì, un rebelótt da vedar rótt, in pü la caséta la picäva cuntra la ringhéra di scär e la tiräva adree änca i väs di geràni: la póra dóna i a curäva cun tänt amûr… quänta aqua e pìsa la ghe däva par tegnii sèmpar in fiûr!
Lü al s’eva scundüü dadree dul cantûn dul balatói, al scür, a specià… mìa par täntu, parchè la sûa maséra nul sentì quel rebeléri, quel tempuräl da védar e väs l’avéva pensaa: “Mô ul Lisändar l’è burlaa giô dai scär, fórsi al s’è änca fai maa, che bestia!” e föra a guardà bass ma l’eva scür e sa vidéva nagótt e alûra lee da cursa, in mèzz ai védar, ai väs e ai fiûr, l’eva naia dabass a cercà ul sò ómm.
Lü, svèlt ’me un gatt, l’avéva cataa l’üsc da cà e l’avéva metüü sü ul cadenàsc.
La Rusìna l’avéva capii l’antìfuna trópp in ritärd, la pórta la sa verdéva mìa: ul sò ómm l’eva in cà ch’al ridéva fórt ma sènza vus.
«Vèrd la pórta, famm entrà, te see mìa un óman, te gh’heet ul cô bisìaa, purscèll d’un vilän!».
«Te pódat mìa fägh pasà di mumènt inscì brütt a la tûa gióia, al tò barlüm di öcc, dumändum scüsa, l’è stai un mumentàsc», al rispundéva, tütt seri, ul Lisändar. «Sa pô mìa ciavà föra ul padrûn da cà, mô ’sa disarann in paés, svergugnäva!».
Tira e bistìra la discüsiûn l’eva naia inänz par un pu: sóta, dabass, gh’eva già un circul cunt i parènt e i visìn da cà.
Ul Lisändar, vist ch’el püblich l’aumentäva, l’avéva verdüü ’na finèstra e tacaa un cumìzi, sumeiäva al Duce in Piàza Venézia:
«Cumpaesän… amìs… parènt… vardii se l’è l’ura da vegnì cà, l’è mei spusà ’n’abisìna, la g’ha püsee rispètt… a dägh trópa cunfidènza se n’aprufìtan, l’ho sèmpar dii… bisögna mìa dägh trópa córda… se la slungan già daparlûr… Quest l’è ul ringraziamènt, mô cun la parità a vegnan a cà a nócc faia… Viältar, ’sa disii?… Èèèh…?».
In curtìl quaivün al scurläva ul cô, vün al ridéva, un ältar al resiäva cun la Rusìna: l’eva mìa l’ura da sveglià la bräva gènt!
La sûa tusa, mama dul Rizadìn, l’avéva cataa la mama: «Mô, ’sa te gh’hee fai al pà? Te divèntat vegia e te pèrdat ul sentimènt, metìvas a póst, i pagn spurch lavéi a cà vóstra, mìa in piàza: l’è própi vera, a ’na cèrta età ul cô al cumìncia a slävagiass!».
La Rusìna la stäva pü nu la pèll: i a vuréva cupà tücc. “Mô änca questa e par la päga al ma cata par ul cüü, sun rivaa a la mia età e guardee che figüràscia”, la pensäva inscì e ghe vegnìva ul magûn.
Ul Lisändar a la finèstra al muläva mìa ul balìn: «Guardee gènt, guardee, la sa pentiss, l’ha capii che l’ha faia grósa… Vegn sü stèla, ul tò ómm, che l’è un sänt, al ta perdóna, pô süced da scapà via un pee; te se regórdat, sü l’altär emm dii: nu la bóna e catìva salüd… Incö l’è naia inscì, sun ’me quell du la paràbula: a vèrdi i brasc e foo fèsta a la pegurèla smarìva… al ripéti dinänz a tücc, ta perdóni!».
I visìn da cà avévan tiraa ul fiaa, finalmènt sa pudéva durmì, po’ gh’eva stai un batimän e tücc avévan elugiaa la buntà e ul giudìzi dul Lisändar; lü al savéva pü ’me tratégn la ghignäva – al ridéva sótt i barbìs, da güst – perô, a füria da parlà, ghe s’eva secaa la gura.
«Vegn sü Rusìna che ta doo un basìn… vegnii sü änca viältar: bisógna festegià… a vèrdi ’na butìlia da quell bun!».
A vólt l’è mei avégh a che fà cunt un ’gnuränt ’me un bö, cunt un matócch… mìa cunt un balóss: la Rusìna perô la savéva già! Po’, par fägala pagà al Lisändar, evan mìa stai asee i Quarantûr, nänca tüta la Quarésima!

Una risposta a “I mè augüri par un Natäl e un ann növ culmi da salüd, speränza e sudisfaziûn… dal mè libar “I balóss” – Ul Lisändar”

  1. I mè augüri par un Natäl e un ann növ culmi da salüd,
    speränza e sudisfaziûn… dal mè libar “I balóss” – Ul Lisändar
    | Alessandria – Lisòndria
    I’m amazed, I have to admit. Seldom do I come across a blog that’s both educative and engaging, and let
    me tell you, you have hit the nail on the head.
    The problem is something which not enough men and women are speaking intelligently about.
    Now i’m very happy I stumbled across this during my hunt for something regarding
    this.

    Here is my page :: certified pre-owned cars

I commenti sono chiusi.